Bilayska Dalxiiska Myanmar ayaa xidhay nin Sri Lankan ah galabnimadii Khamiista. Dalxiisahan ka yimid Sri Lanka ayaa lagu eedeeyay in uu xiriir la lahaa dadkii ku lug lahaa qaraxyadii Easter-ka ee Sri Lanka oo ay ku dhinteen ugu yaraan 250 qof/
Abdul Salaam Irshhad Mohmood, oo 39 jir ah, ayay booliisku xidheen markii uu ka soo muuqday xafiiska socdaalka ee badhtamaha magaalada Yangon si uu u cusboonaysiiyo fiisaha dalxiiska. Xarigga ayaa yimid kadib markii booliska Dalxiiska Myanmar ay Arbacadii codsi u direen Hoteelka iyo Waaxda Dalxiiska ee dalkaas si ay ugu soo sheegaan in ninkan uu iska diiwaan geliyay hoteellada ama guryaha martida ee dalkaas. Myanmar, huteelada iyo guryaha martida waxa lagu shaqeeyaa shati ay ogolaatay waaxdu.
Sida ku cad warqad ay waaxda u dirtay hoteellada iyo guryaha martida, tuhmanaha oo u dhashay Sri Lanka, ayaa Yangon ku yimid fiisaha dalxiiska bishii Janaayo 2018. Warqadda ayaa sidoo kale ku qoran lambarka baasaboorka iyo sidoo kale taariikhda dhalashada.
Abdul Salaam Irshaad Mohmood waxa uu si xad dhaaf ah u joogay ( fiisihiisa dalxiiska) hal sano iyo laba bilood. Ma cadda in mas’uuliyiinta Sri Lanka ay ku wargeliyeen dowladda Myanmar xogta ah in tuhmanaha uu ku sugan yahay Myanmar.
Wixii ka dambeeyay qaraxyadii Axaddii Easter-ka, mas’uuliyiinta Sri Lanka waxa ay sheegeen in dhammaan dadka looga shakisan yahay in ay maleegayeen weerarradaas iyo kuwa sida tooska ah loola xiriirinayo in la xiray ama la dilay. Waxay sheegeen in duqeymahan loo malaynayo inay ka dambeeyeen laba kooxood oo Islaamiyiin ah oo maxalli ah oo aan caan ahayn, kuwaas oo kala ah National Tawheed Jamaath (NTJ) iyo Jamathei Millathu Ibrahim (JMI). Kooxda Daacish ayaa sheegatay mas’uuliyadda weeraradaasi.