Madaxweynaha Zambia, Hakainde Hichilema, oo inta badan lagu tilmaamo mid ka mid ah ganacsatada ugu qanisan Zambia oo la sheegay in hantidiisu ay ku dhowdahay 390 milyan oo dollar, ayaa maanta ku dhawaaqay in aanu wax mushahar ah helin tan iyo markii uu noqday madaxa dawladda dalkaas bishii Ogosto.
Ka hor inta uusan noqon madaxweynaha Zambia, Hichilema oo hantidiisa ku sameeyay beero iyo dhaqashada xoolaha ayaa ka hadlay mushaar kordhin loo sameeyay madaxweynaha iyo wasiirada xukuumadda.
"Tani waxay sharaf dhac ku tahay Zambian-ka caadiga ah ee ku dhibtoonaya inuu iibsado cunto. Waxaan ka jeclaan lahaa in aan dadka lacagta siiyo intii aan mushaharka ii kordhin lahaa.” Hakainde Hichilema tweeted sanadkii hore
Isagoo xaqiijinaya inuu si bilaash ah ugu shaqeeyay tan iyo markii uu xafiiska la wareegay, Hichilema wuxuu ku andacoodey inuusan "fiirin" mushaarkiisa sababtoo ah wuxuu diiradda saarayay sidii uu "nolosha dadka u wanaajin lahaa."
Warbaahinta Qaranka ayaa horay uga soo xigatay Wasaaradda Maaliyadda ee dalka in Hichilema uusan wax mushaar ah qaadan tan iyo markii uu noqday madaxa dowladda bishii Ogosto, kaddib markii uu ku guuleystay doorashadii madaxtinimada.