Daadad iyo dhul go’ ka dhashay roobab culus oo ka da’ay galbeedka Japan ayaa galaaftay nolosha ugu yaraan 176 qof maanta oo Arbaca ah, sida ay sheegtay warbaahinta gudaha oo soo xiganaysa madaxa golaha xukuumadda Yoshihide Suga.
Ku dhawaad 70 ayaa lagu soo waramayaa in ay ku dhinteen deegaanka Hiroshima ee ay dhibaatada ugu daran ka dhacday oo kaliya.
Maamulka ayaa sheegay in wali la la’yahay tiro dad ah oo boqolaal kun ay saameysay musiibadan.
Mar sii horreysay, Ra’iisul Wasaare Shinzo Abe ayaa baajiyay safar uu qorsheynayay inuu ku tago Yurub iyo Bariga Dhexe, wuxuuna booqday xarun dadka laga daadgureeyay oo ku taal Kurashiki si uu u kormeero jawaabta dowladda ee musiibada.