Seoul – Kuuriyada Koonfureed ayaa isniintii diiday dalab uga yimid Kuuriyada Waqooyi si ay u soo nooleyso mashruuc dalxiis oo faa’iido badan leh.
Wasaaradda Mideynta ee Seoul ayaa sheegtay in ay diiday dalab ay u soo bandhigtay Pyongyang si ay ugala hadasho sii wadida mashruuca dalxiiska ee xuduudaha ee buurta Kumgang ee waqooyiga.
Mashruucan ayaa la hakiyay sanad ka hor, markii dalxiise u dhashay Kuuriyada Koonfureed ay toogteen askarta Kuuriyada Waqooyi, markii ay dhex mushaaxday aag milatari oo xaddidan.
Talaabadan ayaa timid labo todobaad kadib markii maraakiibta labada dal ay rasaas isku weydaarsadeen meel u dhow xuduud badeedka lagu muransan yahay ee badda Jaallaha ah.
Afhayeen u hadlay wasaaradda ayaa sheegay in soo jeedintu ay timid booqasho uu ku tagay Hyun Jung Eun, oo ah madaxa kooxda Hyundai ee sidoo kale maamulaysay safarrada, Kumgang.
"Uma aragno soo jeedin wadahadal rasmi ah oo u dhexeeya dawladaha," afhayeenka wasaaradda midaynta Chun Hae-sung ayaa yidhi. Ma cadda in Kuuriyada Waqooyi ay bixin doonto dalab la mid ah kanaalada rasmiga ah.
Kuuriyada Waqooyi ayaa horey u diiday baaritaan wadajir ah oo lagu sameeyay toogashadii sanadkii hore, taasoo ah shuruud muhiim u ah Kuuriyada Koonfureed oo dib u soo nooleynta dalxiisyada.
