Cudurka daacuunka ee ka dillaacay Zimbabwe bishii Agoosto ee la soo dhaafay ayaa hoos u sii socday bishii hore iyadoo hay'adaha gargaarku ay sii wadeen dadaallada ay kula dagaallamayaan cudurka, sida lagu sheegay warbixintii ugu dambeysay ee Qaramada Midoobay.
Xafiiska Qaramada Midoobay ee isku xirka arrimaha bini'aadantinimada (OCHA) ayaa soo sheegay 65 caabuqa daacuunka dhamaadkii bishii April iyadoo afar ay u dhinteen, marka la barbar dhigo 26 xaaladood iyo 13 dhimasho ah bishii hore.
Tirada guud ee dadka uu soo ritay daacuunka ayaa gaartay 97,400 halka dhimashaduna ay ahayd 4,271 tan iyo bishii Agoosto 2008dii.
Xarunta Taliska iyo Xakamaynta Daacuunku waxa ay sii waddaa bixinta agabka caafimaad ee degmooyinka, waxaana dhammaan gobollada la gaadhsiiyey agabka iyo matoorrada daacuunka, halka hay’adaha la shaqeeya UN-ka ay gacan ka geysanayaan dedaallada lagu xakamaynayo, iyaga oo khibrad u leh maaraynta kiisaska, qaybinta agabka aan cuntada ahayn, qodista ceelasha riigga ah iyo biyo dhaamin.
Sidoo kale bishii Abriil, xirmooyinka nadaafadda aasaasiga ah ayaa laga qaybiyay 14 degmo waxaana agabka aan cuntada ahayn (NFI) oo dheeraad ah la gaarey ilaa 93,000 qoys, ugu yaraan 465,000 oo qof.
Hay'adaha gargaarka ee ka shaqeeya biyaha, fayadhowrka iyo nadaafadda ayaa sidoo kale ka jawaabaya kororka daacuunka marka ay dhacaan, iyaga oo diiradda saaraya dadaallada Harare ee Abriil.
Hay’adda caafimaadka adduunka ee WHO ayaa ku wareejisay wasaaradda caafimaadka iyo daryeelka carruurta kombiyuutarro iyo qalab isgaarsiineed, iyadoo ujeeddadu tahay sidii loo xoojin lahaa ilaalinta xogta iyadoo loo marayo maamul wanaagsan.
